一講起「尿弱」、「排尿困難」，大家第一時間會想起男士前列腺肥大。但其實，女士一樣會面對排尿困難。女士冇前列腺，點解都會尿弱、要用力先尿到、甚至排唔淨？今次同大家拆解女性排尿困難嘅常見原因。
女士排尿困難嘅三大類原因
排尿要順暢，需要兩個條件：膀胱夠力收縮，同埋尿道夠闊允許尿液通過。女士出問題，通常離唔開以下三類：
1. 出口阻塞（有嚟擋住）
- 盆腔器官脫垂：最常見。膀胱或子宮下垂，壓住或扭曲咗尿道，令尿液難以排出。有些女士要用手推返入去先尿到。
- 尿道狹窄：過往嘅手術、創傷或反覆感染引起疤痕。
- 手術後遺症：例如治療尿失禁嘅吊帶手術太緊。
2. 膀胱無力（收縮唔到）
- 神經系統問題：糖尿病引起嘅神經病變、中風、多發性硬化症、或脊椎受傷。
- 膀胱過度脹脹：長期忍尿或曾經嚴重尿濡留，令膀胱肌肉失去彈性。
- 藥物影響：感冒藥（抗組織胺）、抗抑鬱藥、或治療膀胱過動症嘅藥物。
3. 協調失調（盆底肌唔識放鬆）
正常排尿時，盆底肌要放鬆。但有些女士排尿時，盆底肌反而不自覺地收緊（Fowler's Syndrome 或盆底肌緊張），變相自己擋住自己。
點樣檢查同診斷？
醫生會先做尿流率測試（尿落一部特別嘅機器度流速），同埋照超聲波看殘餘尿量。同時會做盆腔檢查，看有冇器官脫垂。如果原因唔明顯，可能需要做尿動力學檢查，測量膀胱內嘅壓力，分辨到底係「膀胱冇力」定係「出口阻塞」。
治療方法因人而異
對症下藥最重要：
- 脫垂引起：使用子宮環（Pessary）或做修補手術。
- 尿道狹窄：尿道擴張手術。
- 盆底肌協調失調：盆底物理治療（生物回饋），重新學習放鬆。
- 膀胱無力：如果殘尿太多，可能需要學習「清潔間歇性導尿」（CISC），即係每日定時自己插喉放尿，保護腎臟。
女士排尿困難絕對唔係「年紀大必然嘅事」。如果發覺尿流變弱、要用力、或者尿完都覺得未淨，應該及早求醫，找出原因對症下藥。
常見問題
女士排尿困難係咪都係膀胱脫垂引起？
膀胱脫垂係常見原因之一，但唔係唯一：尿道狹窄、盆底肌過度緊張、膀胱收縮無力、糖尿神經病變、藥物都可以。要做尿流率、殘尿測試同身體檢查，有時要尿動力學先分到。
咩係「盆底肌協調失調」？
正常排尿時盆底肌要放鬆，但部分女士排尿時反而繃緊——尿流斷續、要用力。最有效係盆底物理治療重新學放鬆，藥物手術都幫唔到。
女士長期排唔淨有咩後果？
殘尿多會引起反覆尿道炎、膀胱石、膀胱功能變差，嚴重可以影響腎功能。新出現、漸進式嘅排尿困難要查明原因，多數都有對應治療。
作者：崔家倫醫生（香港泌尿外科專科醫生）。本文只作公共健康教育用途，不能取代醫生診斷；如有疑問或不適，請向你的醫生查詢。
Katherine Kot
