第 33 篇講過 TURBT（經尿道切除膀胱腫瘤），好多病人以為切完就「搞掂」。其實非肌肉侵入性膀胱癌有個特點：復發率高。所以術後多數要加做膀胱灌注治療——直接將藥物灌入膀胱，鞏固療效。今次講清楚呢個治療係點做、點解要做。
點解切完仲要灌藥？
膀胱癌好似「韭菜」——切咗表面腫瘤，膀胱壁其他位置仲可能潛伏住癌前病變或微小癌細胞。灌注藥物嘅目的係：
- 殺死殘留嘅微小病灶
- 降低復發率
- 防止腫瘤升級（惡化為侵入性）
藥物直接接觸膀胱壁，唔使經全身血液循環，所以副作用比靜脈化療細得多。
兩大類灌注藥物
- 化療藥（如絲裂黴素 MMC、吉西他濱）：直接殺死癌細胞。低中風險者常用，部分喺術後 24 小時內即時灌一次，已可明顯降低復發。
- BCG（卡介苗）：冇錯，就係預防結核病嚐隻疫苗。灌入膀胱後激發強力局部免疫反應，等免疫系統自己攻擊癌細胞。係中至高風險嘅標準方案，防復發同防惡化嘅效果係各方案中最強。
療程係點安排？
灌注唔係一次完事，而係一個療程：
- 誘導期：每星期一次，連續 6 星期
- 維持期（BCG 常見）：之後每月一次或每三個月三次，長達一至三年
每次過程：放幼導尿管灌藥 → 忍住唔排 → 藥物喺膀胱停留一至兩小時，期間定時轉身（仰臥、俯臥、左右側臥）等藥液接觸曬成個膀胱壁 → 排出。成個過程喺日間診所完成，唔使住院。
常見副作用：膀胱刺激屬正常
灌完頭一兩日，尿頻、排尿灼痛、輕微血尿係預期之內，反映藥物正在起作用。BCG 可能附加低燒、疲倦，似輕微感冒。呢啲多數一兩日內消退。副作用隨療程次數可能累積加重，醫生會按情況調整劑量或間距——唔好因為唔舒服就自己放棄療程，停曬藥復發風險會返返嚟，有問題同醫生傾調整方案。
膀胱灌注係「打持久戰」嘅治療，夥拍定期膀胱鏡覆查，先係非肌肉侵入性膀胱癌嘅完整管理。乖乖完成療程，復發率可以減低一大截。
常見問題
BCG 唔係預防結核病嘅疫苗咩，點解灌入膀胱？
BCG 灌入膀胱後會激發局部免疫反應，等免疫系統攻擊膀胱壁上嘅癌細胞。係中至高風險非肌肉侵入性膀胱癌術後嘅標準輔助治療，可以明顯降低復發同惡化風險。
灌注過程係點？會唔會痛？
護士會放一條幼導尿管，將藥液灌入膀胱，然後忍住等藥物喺膀胱停留約一至兩小時，期間定時轉換姿勢等藥液接觸整個膀胱壁。過程多數只係輕微不適。
灌注有咩副作用？幾時要停？
常見係膀胱刺激：尿頻、排尿灼痛、輕微血尿，多數一兩日消退。BCG 可能引起類似感冒嘅低燒。如果發高燒、血尿持續、症狀嚴重，要通知醫生，可能要暫停療程。
作者：崔家倫醫生（香港泌尿外科專科醫生）。本文只作公共健康教育用途，不能取代醫生診斷；如有疑問或不適，請向你的醫生查詢。
Katherine Kot
